Ní airím bhéarsa ó lon ná ó chéirseach
Ní fhásann féar ins na gaortha ceart,
Mar nach bhfuil suim ag a’ spéirbhean i spórt ná i bpléisiúr
Ach i ag gol ‘s a’ béiceadh ‘s ag réabhadh bas
A rá liom ‘Faoiseamh ní bhfaighidh na séimh-fhir
Aon oíche in Eirinn, ná uain chun ‘reast’
Ag a’ trúp so mhéirligh, atá ag teacht lena chéile
Ó buaileadh go daor sinn ar Shliabh na mBan.

Is oth liom féinigh bualadh an lae úd,
Do dhul ar Ghaeil bhocta ‘s na céadta slad
Mar atá na méirligh a’ dhéanamh ‘game’ dinn
Is a rá nach aon ní leo píc ná slea
Níor tháinigh ár Major i dtúis an lae chughainn
Is ní rabhamar féin ann i gcóir ná i gceart
Ach mar seolfaí tréada de bhuaibh gan aoire
Ar thaobh na gréine de Shliabh na mBan.

Mo léan léir an dream gan éifeacht
Nar fhan le h-éirim, is d’óiche stad
Go mbéadh Dúiche Déiseach agus Iarthar Éireann
A’ triall le chéile o’n dtír aneas.
Bhéadh ár gcampaí déanta le fórsaí tréana
Bhéadh cúnamh Dé linn, is a’saol ar fad
Is ní dhíolfadh méirleach de Mhuintir Néill sinn
Ach bhuaidhfí an réim linn ar Shliabh na mBan.

Sé Ros do bhreoigh is do chlaoí go deo sinn
Mar a fágadh mór-chuid dinn sínte lag
Na leanaí óga ‘ na smólaibh ann dóite
Is an méid a d’fhan beo dhíobh cois claí nó scairt
Ach geallaim fós díbh, an té a dhein an fóghladh
Go mbéam i gcóir dó le píc is le slea
Is go gcuirfeam Yeomen ag crith ‘na mbrógaibh
Ag díol an chomhair leo ar Shliabh na mBan.

Is mó fear aosta gus crobhaire gléigeal
O am go céile do gabhadh le seal
Go bhfuil córdaí caola a’ baint lúth a ngéag díobh
I ndoinsiúin daora go domhain faoí ghlas
Gárdaí taobh leo ná leomfadh sméid ortha
Do dhéanfadh plé dóíbh i dtír thar lear
Le na dtabhairt soar ón a namhad gan buíochas
In am an tsaothair ar Shliabh na mBan.

Tá an Franncach faobhrach len a loingeas gléasta
Faoí crannaibh géara ar muir le seal
Sé an síor scéal go bhfuil a dtriall ar Éirinn
Is go gcuirfid Gaeil bhochta ‘rís ‘na gceart
Dá mba dhóigh liom féineach go mba fhíor an scéal úd
Bhéadh mo chroí có h-éatrom le lon ar sceach
Go mbéadh claoí ar mhéirligh, is na h-adharca dá séideadh
Ar thaobh na gréine de Shliabh na mBan.

Tá na cóbaigh mhóra ag iarraidh eolais
Tá an aimsir óg is an chabhair ag teacht
An té a mhill na gnótha, ‘sé a leighisfidh fós iad
Is ní dhíolfam feoirling leo, cios ná sraith
Píosa coróineach an chuid is mó dhe
Luach éiric bó nó teaglaigh deas
Ach beidh rinnce ar bhóithre is soilse á ndó ann
Beidh meidhir is mórtas ar Shliabh na mBan.